Bakıda Aqarunovun heykəlinin açılış tarixi məlum oldu

Bakıda Aqarunovun heykəlinin açılış tarixi məlum oldu

Abidə sentyabrdan hazırdır

Bakıda Azərbaycanın Milli Qəhrəmanı Albert Aqarunovun şərəfinə ucaldılan abidənin rəsmi açılış tarixi məlum olub.

BakuCity.az-ın məlumatına görə, Nərimanov Rayon İcra Hakimiyyətindən Trend-ə bildirilib ki, A.Aqarunova ucaldılan heykəlin rəsmi açılışı noyabrın 15-nə gözlənilir. Saat 13:00-da nəzərdə tutulan açılış mərasimində icra başçısı və digər rəsmi şəxslər iştirak edəcəklər.

Qeyd edək ki, heykəl Nərimanov rayonunda Milli Qəhrəmanın adına olan küçədə ucaldılıb və abidə sentyabr ayından artıq hazırdır. Heykəlin kompozisiyası tanınmış heykəltaraş Ömər Eldarova məxsusdur.

Xatırladaq ki, A.Aqarunov 25 aprel 1969-cu ildə Bakının Əmircan qəsəbəsində, yəhudi ailəsində anadan olub. Qarabağ müharibəsi başlayarkən 1992-ci ildə könüllü olaraq cəbhəyə yollanıb. Tank komandiri təyin edilən A.Aqarunov Şuşa cəbhəsində döyüşüb. O, Xankəndi, Daşaltı, Cəmilli istiqamətində gedən döyüşlərdə erməni işğalçılarının xeyli canlı qüvvəsini, zirehli texnikasını məhv edib. Ermənilərin Şuşaya hücumu vaxtı A.Aqarunov düşmənin 9 tank, 7 ZTR və bir çox texnikasını məhv edib.

A.Aqarunov 8 may 1992-ci ildə Şuşa uğrunda gedən döyüşlərdə snayper gülləsinə tuş gələrək döyüş meydanında həlak olub.

Bakıda Şəhidlər Xiyabanında dəfn edilib. Bu il 50 illik yubileyidir.

BakuCity.az

Bakı Albert Aqarunov heykəl
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər