Bakıda bu binalara istilik sistemi verilməyəcək

Bakıda bu binalara istilik sistemi verilməyəcək

Bəzi binalarda istilik mənbələri sıradan çıxıb

Noyabrın 15-dən Bakıda yaşayış binalarına istilik sisteminin verilməsi məqsədilə qazanxanaların vaxtından əvvəl işə salınması barədə məlumat verilib. Paytaxtın bəzi rayonlarında yerləşən binaların girişinə isə bildiriş vurularaq istilik sisteminin noyabrın 1-dən veriləcəyi bildirilib.

BakuCity.az saytı məsələ ilə bağlı “Azəristiliktəchizat” ASC-nin Abonent və müştəri xidmətlərinin rəisi Rafiq Əliyevlə əlaqə saxlayıb.

R.Əliyevin sözlərinə görə, həmin bildirişlər ona görə yazılıb ki, o binalara noyabrın 1-dən istilik veriləcək:

“Yəni soyuq su rejimindən isti su rejiminə keçidin yoxlanış prosesi olacaq. Elanı da onunla bağlı vermişik ki, kimin evinin istilik sistemində axıntı problemləri varsa, həll etsin, isti su veriləndən sonra binanın zirzəmisindən xətti bağlayıb təmir işi görməsinlər. Bu səbəbdən noyabrın əvvəlindən sakinlərinə məlumat veririk, amma istiliyi noyabrın 15-dən etibarən verəcəyik”.

Bəzi yerlərdə istilik sisteminin verilməsindən sonra da sakinlərin şikayətlərinin səngiməməsinə gəlincə, ASC rəsmisi qeyd edib ki, mərkəzdən kənarda olan istilik təchizatı şəhər mərkəzindəki istilik təchizatından iki dəfə yaxşıdır:

“Məsələn, Pirallahı, Müşfiqabad, Sahil, Ələt və digər qəsəbələrdə istilik olmayan bina yoxdur. Amma Bakının mərkəzində bunlara nisbətən istilik almayan problemli binalar var. Mərkəzində memarlıq nümunəsi olan binalar var ki, istilik mənbələri sıradan çıxıb və bir çoxunda yeni istilik mənbəyi yaratmaq mümkünsüzdür.

Mikrorayonlarda isə bir çox binalar 60-70-ci illərdə tikilib, döşəmə-tavanı sıradan çıxıb və su verən kimi mənzilləri su basır. Bu səbəbdən həmin binalara istilik vermək mümkün deyil. Hər birinin öz texniki problemləri var”.

Arzu Murad

BakuCity.az

Bakı istilik sistemi
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər