Bakıda reklam edilən elektron siqaretlər və tütün qızdırıcıları sağlamlığa ziyan deyil?

Bakıda reklam edilən elektron siqaretlər və tütün qızdırıcıları sağlamlığa ziyan deyil?

Qiyməti 300 manata qədər dəyişir

Siqaret çəkməyin zərərlərindən çox danışılır: ağciyər xərçəngi, xroniki bronxit, ürək xəstəlikləri - bunlar siqaretdən istifadənin gətirə biləcəyi ziyanın yalnız kiçik bir siyahısıdır. Lakin elm dayanmadan inkişaf edir və elm adamları təhlükəni minimuma endirən,  hətta pis vərdişdən qurtulmağa kömək edən hər cür qadcetlər icad edirlər.

BakuCity.az bugünkü məqalədə adi siqaretləri elektron siqaretlə müqayisə edəcək. 

Nikotinin ənənəvi "qəbulu"

Yanan bir siqaret 700-900 dərəcəyə qədər qızır ki, bu da ağciyərlərin çürüməsinə səbəb olur. Hətta ən kiçik siqaretin tərkibində çox miqdarda nikotin var ki, bu da hər qullabdan sonra beyinə daxil olur. Bu narkotik maddə damarların spazmına səbəb olur. Nəticədə damarlar oksigenlə kifayət qədər doymur və dəri tez qocalır.

Siqaret çəkənlərdən həmişə xoşagəlməz tütün qoxusu gəlir, sarı dişləri və insanları onlardan uzaqlaşdıran daha bir neçə mənfi xüsusiyyətləri olur. Bu asılılıqdan qurtulmağa az adamın iradəsi çatır. Bundan əlavə, zərər yalnız öz sağlamlığına deyil, ətrafdakılara, yəni passiv siqaret çəkənlərə də vurulur. Buna görə də bir çox ictimai yerlər var ki, orada siqaret çəkmək qadağandır. 

Elektron siqaretlər siqaret çəkənlər üçün dərdə dərman sayıla bilərmi?

Elektron siqaretlər və ya veyplər təkcə görünüşlərinə görə deyil, həm də mahiyyətinə görə əsaslı şəkildə fərqlənirlər. Elektron siqaretlərdə tütün yanmır, yalnız maye qızır, buna görə də bədənə tüstü əvəzinə buxar daxil olur. Belə qadcetlərin istehsalçıları həmin cihazların adi siqaretlərdən fərqli olaraq sağlamlığa ciddi zərər vermədiyini və siqaretdən imtinaya kömək etdiyini iddia edirlər. Ancaq bu, hələ elmi təsdiqini tapmamış mübahisəli məsələdir.

Elektron siqaretlərdə az miqdarda da olsa, qida dərəcəli propilen qlikol, qliserin, su, aromatizatorlar və nikotin var. Bundan əlavə, nikotinin siqaret asılılığına səbəb olan psixoaktiv bir maddə olduğunu unutmamalıyıq. Beləliklə, gənclər arasında çox populyar olan veyplər, əksinə, siqaret çəkmək istəyini artırır. Nikotinsiz elektron siqaretlər də var, ancaq buxarla selikli qişasına və ürək-damar sisteminə təsir edən zəhərli maddələrin bədənə daxil olduğunu unutmayaq.

Bakıda reklam edilən elektron siqaretlər və tütün qızdırıcıları sağlamlığa ziyan deyil?, fotoşəkil-1

Glo və IQOS tütün bazarını zəbt etdi

Son vaxtlar Bakıda siqaret çəkənlər üçün başqa bir innovasiya – “Glo” və IQOS tütün qızdırıcıları israrla reklam olunur.

İstehsalçılar bu cihazda tütünün yalnız 240-245 dərəcə qızdığına diqqət çəkirlər. Bu halda nikotinlə doymuş aerozol əmələ gəlir. Tüstünün, külün və xoşagəlməz tütün qoxusunun olmaması səbəbindən bu üsula təmiz siqaret də deyilir. Maraqlıdır ki, bir çoxları qoxunun hələ də hiss olduğunu və adi siqaretdən daha xoşagəlməz olduğunu iddia edirlər. 

Yeni nəsil siqaret: keyfiyyət və qiymət 

Elektron siqaretlər bir batareya bloku və bir buxarlandırıcıdan ibarətdir. “Glo” cihazında isə bir USB kabel və bir təmizlik fırçası var. Elektron siqaretləri 2 manatdan başlayan qiymətlərlə əldə etmək olar. Bəzən qiymət 200 manata qədər çata bilər. “Glo” və IQOS kimi cihazların qiyməti isə 45 manatdan 300 manata qədər dəyişir.

Bakıda reklam edilən elektron siqaretlər və tütün qızdırıcıları sağlamlığa ziyan deyil?, fotoşəkil-2

Maraqlıdır ki, Rusiyada Dövlət Duması elektron siqaretin bütün növlərini, həmçinin qəlyanları tütün məhsulları ilə eyni tutmaq haqqında qanun layihəsinə baxır.

Yeni cihazların zərərləri hələ tam sübuta yetirilməyib, buna görə də elm adamları məsələyə aydınlıq gətirmək üçün araşdırma aparırlar.

Sidneydəki Tibb Tədqiqatları İnstitutundan Pavan Şarma elektron siqaretlərlə bağlı araşdırma aparıb. Nəticədə elm adamları bütün bu cihazların düz əzələ hüceyrələrinə və epitelial hüceyrələrə mənfi təsir göstərdiyi qənaətinə gəliblər. Bu proseslər sətəlcəm və ağciyər xərçəngi kimi ölümcül xəstəliklərə də yol aça bilər.

Züleyxa İsmayılova

BakuCity.az

Bakı elektron siqaretlər tütün qızdırıcıları
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər