Bakıda elektron siqaretlər və tütün qızdırıcılarının reklamına niyə icazə verilir?

Bakıda elektron siqaretlər və tütün qızdırıcılarının reklamına niyə icazə verilir?

Buna görə cərimə nəzərdə tutulur

Bakıda ara-sıra elektron siqaretlər və ya tütün qızdırıcılarınının (Glo, IQOS) reklamına rast gəlinir. İstər-istəməz sual yaranır: bu növ məhsullar tütün məmulatı sayılırsa, reklamına niyə icazə verilir?

Məsələ ilə bağlı BakuCity.az Azad İstehlakçılar Birliyinin sədri, Beynəlxalq İstehlakçılar Təşkilatının Azərbaycandakı nümayəndəsi Eyyub Hüseynovun fikirlərini öyrənib.

E.Hüseynov qeyd edib ki, bu cür məhsulların ölkədə istər açıq, istərsə də qapalı şəkildə reklamına icazə verilməməlidir:

“On ildən artıqdır ki, tütün məhsullarının, xüsusilə də Yaponiyadan Azərbaycana gətirilən elektron siqaretlərin satışı və reklamı ilə mübarizə aparıram. Tütün məhsulları nə qədər zərərlidirsə, elektron siqaretlər və tütün qızdırıcıları da o qədər zərərlidir. Amma çox təəssüf ki, bu gün ölkə ərazisində, xüsusilə də paytaxtda bu məhsulların reklamı artır – həm bukletlər şəklində, həm də market və s. kimi yerlərdə. Layt adlandırılan siqaretlər də var ki, guya tərkibində nikotin olduqca azdır və insan sağlamlığına zərər vurmur. Filtrli, filtrsiz, elektron və ya “Glo” – hamısı eyni dərəcədə zərərlidir”.

O bildirib ki, Azərbaycanda tütün və tütün məhsullarının istifadənin azaldılması ilə bağlı bütün qərarlar elektron siqaretlərə və tütün qızdırıcılarına birmənalı şəkildə aid edilməlidir:

Həmçinin oxu: Bakıda reklam edilən elektron siqaretlər və tütün qızdırıcıları sağlamlığa ziyan deyil?

“Azərbaycan Respublikasında qeyri-infeksion xəstəliklərlə mübarizəyə dair 2015-2020-ci illər üçün Strategiya”da göstərilir ki, 2020-ci ilə qədər ölkədə tütündən istifadə 10% azaldılmalıdır. Təəssüflər olsun ki, bu strategiya həyata keçirilmir.

Artıq üç ildir ki, Şəkidə fəaliyyət göstərən bir tütün fabriki “Karvan”, “Marxal” və “Şəki” kimi siqaretlər istehsal edir. Hazırda paytaxtda siqaretlərin topdansatış mərkəzləri fəaliyyət göstərir. Bu satış mərkəzlərində satılan tütün məhsullarının ekspertizasını xaricdə keçirmişik və məlum olub ki, zərərli maddələrin miqdarı normadan 67% artıqdır. Müvafiq dövlət orqanı da bu məhsulların satılmasının qarşısının alınması üçün tədbirlər görüb, amma azad bazar iqtisadiyyatından sui-istifadə olunaraq bu gün də bu məhsulların satışı davam edir”.

Azad İstehlakçılar Birliyi sədrinin fikrincə, Azərbaycan dünyada az ölkələrdən biridir ki, müasir marketlərə girdikdə insan ilk olaraq siqaret reklamları ilə qarşılaşır:

“Bu isə təbii ki, düzgün deyil. Ən azından, MDB təcrübəsi tətbiq edilərək siqaretlərin üstü örtülməlidir”.

Dövlət Reklam Agentliyindən (ADRA) isə saytımıza bildirilib ki, “Reklam haqqında” qanunun 28-ci maddəsinə əsasən, tütün, tütün məmulatlarının və onların ləvazimatlarının, o cümlədən tənbəki çubuqlarının, qəlyanların, elektron siqaretlərin, siqaret kağızlarının, alışqanların reklamı qadağandır:

“Dövlət Reklam Agentliyi adıçəkilən məmulatların açıq məkanda reklamına icazə vermir. Əgər hər hansı reklam yayıcısı bununla bağlı qanunun tələblərini pozarsa, Agentlik zəruri tədbirlər həyata keçirir. Bu zaman qanunvericiliyin tələblərinə əməl etməyən sahibkar cərimələnə də bilərlər”.

Qeyd edək ki, İnzibati Xətalar Məcəlləsinə görə fiziki şəxslər üçün 300 manatdan 500 manatadək, vəzifəli şəxslər üçün 1500 manatdan 2500 manatadək, hüquqi şəxslər üçün isə 5000 manatdan 10000 manatadək məbləğdə cərimə nəzərdə tutulur.

Ramilə Qardaşxanqızı

BakuCity.az

Bakı elektron siqaretlər tütün qızdırıcılar
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər