Hüseyn Cavidin heykəli: Ana və İblis, qızılgüllərə sevgi - FOTO

Hüseyn Cavidin heykəli: Ana və İblis, qızılgüllərə sevgi - FOTO

Heykəltəraş Cavidin qızılgüllərə sevgisini unutmayıb

Repressiya qurbanı Hüseyn Cavidin monumental abidəsi paytaxtda 26 il öncə ucaldılıb.

BakuCity.az “Bakının heykəlləri” rubrikasında məşhur heykəltəraş, Azərbaycan Respublikasının Xalq rəssamı, Azərbaycan Milli Elmlər Akademiyasının həqiqi üzvü, Azərbaycan Rəssamlıq Akademiyasının rektoru, "Heydər Əliyev" ordeni laureatı Ömər Eldarovun əsəri – şair, yazıçı və dramaturq Hüseyn Cavidin monumental abidəsindən bəhs edir.

Sənətşünaslıq üzrə fəlsəfə doktoru, dosent Samir Sadıqov abidə barədə saytımıza maraqlı məlumatlar verib.

S.Sadıqov deyir ki, 1990-cı illərdə ölkə həyatında baş verən mühüm ictimai-siyasi dəyişikliklər və çətinliklərə baxmayaraq, incəsənətin, xüsusilə də təsviri sənətin inkişafı davam edib. Heykəltəraşlarımız bu dövrdə də fəaliyyət göstərib və bir sıra uğurlu əsərlər yaradıblar:

“Həmin çətin dövrlərdə yaradılan sənət əsərlərindən biri isə Azərbaycan ədəbiyyatında romantizm ədəbi cərəyanının əsas nümayəndəsi, milli romantik şeirin və mənzum faciənin banisi kimi tarixə düşmüş Hüseyn Cavidin abidəsidir. Görkəmli tişə ustası, monumental sənət əsərləri ilə təkcə respublikamızda deyil, onun hüdudlarından çox-çox uzaqlarda da məşhur olan, Xalq rəssamı Ömər Eldarovun beş illik gərgin əməyi nəticəsində möhtəşəm monumental fəlsəfi-romantik kompozisiya quruluşlu abidə yaradıldı”.

Həmçinin oxu: "Azad qadın" heykəlinin tarixçəsi: yubiley abidəsi, heykəltəraşın tamamlanmamış işi - FOTO

Sənətşünasın fikrincə, heykəltəraş bu əsərdə (memarlar R.Əliyev və Y.Qədimov) çox maraqlı kompozisiya quruluşu tapıb:

“Bu abidədə ədib dərin düşüncələrə dalmış, zəngin zəka sahibinə malik bir insanı xatırladır. Cavidin fiquru onun əsərlərində yaratdığı simvolik obrazların əhatəsində ucaldılıb. Burada bir-birinə qarşı çıxan iki qüvvə, iki obraz - Ana və İblis üz-üzə, qarşı-qarşıya dayanıb. İblis məkr, zülmət rəmzidir. Məhəbbət, səmimiyyət, xeyirxahlıq rəmzi olan Ana obrazı isə fəlakətə uğrayan insanları sanki şər qüvvələrin əlindən xilas etməyə çalışdığı anda təvsir olunub. Təbii ki, öz yaradıcılığında humanizmi, haqq-ədaləti tərənnüm edən şair də ananın tərəfindədir. Ömər Eldarov Cavidin qızılgüllərə olan sevgisini xüsusi vurğulayıb”.         

O hesab edir ki, kompozisiyanın belə tərzdə qurulması heykəltəraşın ədibin yaradıcılığını yetərincə qavramasından irəli gəlir:

“Şairi yaxından tanıyanların unudulmaz xatirələri, Cavid tədqiqatçılarının məsləhətləri müəllifə bu cür qeyri-adi abidə yaratmaq ideyası verib. Abidə üzərində işə başlayarkən isə heykəltəraş Hüseyn Cavid yaradıcılığına dönə-dönə müraciət edib, əsərlərini oxuyub”.

Hüseyn Cavidin abidəsi 1993-cü ildə paytaxtın ədibin elə öz adını daşıyan prospektində yerləşən parkda – Hüseyn Cavid parkında ucaldılıb. Abidənin ümumi hündürlüyü 10 metrə yaxındır. Kürsülüyü üzərində Hüseyn Cavidin əsərlərindən fraqmentlər həkk edilib.

Hüseyn Cavidin bu möhtəşəm abidəsi ilk dəfə olaraq Bakıda Rəssamlar İttifaqının İstehsalat Yaradıcılıq Kombinatında tuncdan tökülüb.

Hüseyn Cavidin heykəli: Ana və İblis, qızılgüllərə sevgi - FOTO, fotoşəkil-1 Hüseyn Cavidin heykəli: Ana və İblis, qızılgüllərə sevgi - FOTO, fotoşəkil-2 Hüseyn Cavidin heykəli: Ana və İblis, qızılgüllərə sevgi - FOTO, fotoşəkil-3 Hüseyn Cavidin heykəli: Ana və İblis, qızılgüllərə sevgi - FOTO, fotoşəkil-4 Hüseyn Cavidin heykəli: Ana və İblis, qızılgüllərə sevgi - FOTO, fotoşəkil-5 Hüseyn Cavidin heykəli: Ana və İblis, qızılgüllərə sevgi - FOTO, fotoşəkil-6 Hüseyn Cavidin heykəli: Ana və İblis, qızılgüllərə sevgi - FOTO, fotoşəkil-7 Hüseyn Cavidin heykəli: Ana və İblis, qızılgüllərə sevgi - FOTO, fotoşəkil-8

Ramilə Qardaşxanqızı

FOTO: Nicat Alili

BakuCity.az

Bakı heykəl Hüseyn Cavid
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər