Universitetlər Bakıdan köçürülür? - Baş Planın detalları

Universitetlər Bakıdan köçürülür? - Baş Planın detalları

4 prioritet istiqamət seçilib

2020-ci ilin sonunda Bakının Baş Planı ilə bağlı təkliflər hökumətə təqdim olunacaq. Təkliflər içərisində sərnişindaşımada çoxmodallı nəqliyyat vasitələrindən istifadə olunması, metronun konseptual inkişaf sxeminin yenilənməsi, şəhər iqtisadiyyatının yenidən qurulması və başqa məsələlər yer alır.

BakuCity.az AzTV.az-a istinadən məlumat verir ki, çoxmodallı nəqliyyat vasitələri dedikdə paytaxt küçələrində yenidən tramvay və trolleybuslardan istifadə nəzərdə tutulur. Bakının Baş Planında metronun konseptual inkişaf sxeminin təkmilləşdirilməsi də təklif olunur.

Ümumilikdə isə şəhərin ərazi inkişaf planlarının müəyyən edilməsi, şəhərdə post-sənaye iqtisadiyyatının sağlam təməlinin qoyulması, şəhərin yeni biznes və sənaye sahələrinin inkişafı üçün əlverişli məkana çevrilməsi 2020-2040-cı illər üçün hazırlanan Baş Planın əsas hədəfləridir.

Baş Plan 4 prioritet istiqamətə istinad edəcək:

1. Mütəşəkkil çoxmərkəzli şəhər

- Çoxnövlü hərəkətlilik, əlçatan infrastruktur və ağıllı şəhər həlləri.

2. Dayanıqlı şəhər mühiti

- bərpa edilmiş torpaqlar, su hövzələri və sahilyanı ərazilər

- dayanıqlı enerji həlləri

3. Qorunan ənənələr və tarixi irs

- Mühafizə olunan nadir tarixi-memarlıq abidələri

- çiçəklənən mədəni mühit

4. Yeni şəhər iqtisadiyyatı

- yeni bizneslər üçün əlverişli məkan həlləri

- geniş və cəzbedici turizm infrastrukturu

Plana əsasən, yollarda ilk növbədə piyadaların hərəkəti nəzərə alınacaq. Bundan sonra velosiped sürənlərin və ictimai nəqliyyatın hərəkətinə xüsusi diqqət yetiriləcək. Ənənəvi mərkəzlərdən başqa yeni şəhər mərkəzləri yaradılacaq. Baş Planın hazırlanmasında qalib gəlmiş şirkətin nümayəndələri ilə aidiyyəti qurumlar arasında məsləhətləşmələr, müzakirələr isə davam etdirilir.

Tərəfdaş şirkətin nümayəndəsi Yoaxim Şares Baş Planla bağlı bunları deyib: “Sanitar-kommunal məsələlərə, alternativ, təhlükəsiz enerji məsələlərinə xüsusi həssaslıqla yanaşılmalıdır və ən əsası ekoloji çirklənmənin qarşısının alınması diqqətdə saxlanılmalıdır. Bunun üçün bir neçə yerdə yaşıl zonalar yaradılacaq. Və oradan avtomobillərin istifadəsinə qadağa qoyulacaq”.

Belə yaşıl məkanlardan birinin Bulvar ərazisi ilə "28 May" metro stansiyası ətrafı ərazilərini birləşdirməsi təklif olunur. Ali təhsil ocaqlarının Xocahəsən gölünün ətrafına köçürülməsi də müzakirə edilir. 2020-ci ilin sonuna qədər isə müzakirələrin daha geniş auditoriyalarda, yerli və beynəlxalq mütəxəssislərin iştirakı ilə davam etdirilməsi planlaşdırılır.

BakuCity.az

Bakı universitet Baş Plan
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər