İctimai nəqliyyatda gediş haqqı bu tarixdə bahalaşacaq - İDDİA

İctimai nəqliyyatda gediş haqqı bu tarixdə bahalaşacaq - İDDİA

"Tarif Şurasını saya salan yoxdur"

Parlament seçkilərindən sonra dizel yanacağı və gediş haqlarının bahalaşması ehtimalı yüksəkdir.

BakuCity.az xəbər verir ki, bunu Sfera.az-a açıqlamasında bu sözləri 28 May-Lökbatan istiqamətində hərəkət edən 125 saylı marşrut avtobusunda gediş haqqının 35 qəpikdən 40 qəpiyə qaldırılması fonunda yaxın günlərdə ictimai nəqliyyatda gediş haqlarının artırılıb-artırılmayacağı məsələsinə aydınlıq gətirərkən iqtisadçı ekspert Natiq Cəfərli deyib.

Onun sözlərinə görə, ictimai nəqliyyatda gediş haqlarının tənzimlənməsi ilə Tarif Şurası məşğul olmalı olsa da, görünən odur ki, bu qurumu saya salan yoxdur:

"İctimai nəqliyyatda gediş haqqını tənzimləyən qurum Tarif Şurasıdır. Amma nədənsə, Tarif Şurasının qərarı olmadan da bu istiqamətdə qərarların verilməsinə başlanılıb. Ona görə bəzi marşrutlarda qiymətin bahalaşdırılmasının legitimliyi də sual altındadır və bahalaşma səbəblərinə izah verilməlidir. Həm metro, həm də şəhər nəqliyyatında gediş haqqının artırılması ilə bağlı ümumiyyətlə son illər çoxsaylı açıqlama və söz-söhbətlər olub və olmaqda davam edir. Metropoliten rəhbərliyi daşınmanın maya dəyərinin yüksək olduğunu deyir. Avtobuslarla daşınmada da maya dəyərinin yüksək olduğu qeyd olunur”.

Ekspert bildirib ki, 125 saylı marşrutda gediş haqqının bahalaşması yaxın dövrdə bu istiqamətdə növbəti addımların atılacağının ilkin işartısı sayıla bilər.

Bununla belə, N.Cəfərli düşünür ki, gediş haqlarının artırılması istiqamətində əsas addımlar növbədənkənar parlament seçkilərindən sonra baş verəcək:

"Bu mənada hazırda bəzi marşrutlarda gediş haqqının artırılmasına gedilməsi, ola bilsin, gələcəkdə nəqliyyat sahəsində qiymət artımına gediləcəyi ehtimalının yüksək olmasının ilkin göstəricidir. Amma hazırkı situasiyada sərnişin nəqliyyatında qiymət artımına gedilməsinə maneə olan bir amil var, o da ölkənin növbədənkənar parlament seçkilərinə getməsidir. Bu mənada seçkilərə qədər hansısa bir istiqamətdə, o cümlədən ictimai nəqliyyatda qiymətlərin artacağını düşünmürəm. Amma seçkidən sonra nəqliyyatda və digər sahələrdə qiymət artımı ilə bağlı qərarların verilmə ehtimalı yüksəkdir. Seçkidən sonra dizel yanacağının və nəqliyyatda gediş haqqının bahalaşması gözləniləndir”.

BakuCity.az

Bakı ictimai nəqliyyat gediş haqqı
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər