Bakı metrosunun ənənəvi problemi: 30 saniyəyə onlarla insan qatara necə minib-düşsün? - RƏSMİ CAVAB

Bakı metrosunun ənənəvi problemi: 30 saniyəyə onlarla insan qatara necə minib-düşsün? - RƏSMİ CAVAB

"Bakı Metropoliteni" QSC hansı tədbirləri görür?

Bakı metrosunda sərnişin sıxlığı çox olan stansiyalarda vaqonların dayanma müddəti 30, digər stansiyalarda isə 20 saniyədir. Günün pik saatlarında isə sərnişinlərin vaqonlardan çıxıb daxil olması üçün 30 saniyə kifayət etmir – düşənlər olsa da, minmək istəyənlərə vaxt çatmır və maşinist qapıları bağlayır. Bu vəziyyət isə sərnişinlərin narazılığına səbəb olur, həmçinin növbəti qatarı daha çox sərnişinin gözləməsi deməkdir. Maraqlıdır, bu kimi halların nəzarətdə saxlanılması üçün “Bakı Metropoliteni” QSC hansı tədbirləri görür?

BakuCity.az məsələ ilə bağlı QSC-nin mətbuat katibi Bəxtiyar Məmmədova müraciət edib. B.Məmmədov qeyd edib ki, metroda qatarların hərəkəti dəqiqə və saniyələr üzərində qurulur, həmçinin yerüstü nəqliyyatdan fərqli olaraq daha sərt qrafik tətbiq olunur. Bu səbəbdən 20 və 30 saniyəlik dayanma müddəti optimal variantdır:

“Ümumən qatarların dayanma müddəti sərnişin sıxlığı çox olan stansiyalarda 30, digər stansiyalarda 20 saniyədir. Hətta minib-düşən olmasa belə bu qaydalara maşinist riayət edir və buna nəzarət var. Qatarın dayanma müddəti sərnişinin maksimum minib-düşmə imkanlarını da nəzərə alır. Bu və digər məsələlərlə bağlı daimi monitorinqlər, təhlillər aparılır. Qatarlar stansiyalarda uzun müddət, yəni 1 dəqiqə və daha artıq gözləsə, hərəkət intensivliyi aşağı düşəcək. Yəni “Koroğlu”dan “28 May”a 12 dəqiqəyə gəlirsə, bu halda məsafə 15-20 dəqiqəyə qədər uzanacaq. Bu isə metroda hərəkətin təşkili ilə bağlı başqa problemlərə, sərnişin sıxlığının bir qədər də artmasına, daşınma keyfiyyətinin tam aşağı düşməsinə səbəb olar”.

Metropoliten rəsmisi bildirib ki, əsasən, səhər pik saatlarda "Koroğlu" stansiyasında minənlər, axşam isə düşənlər çox olur. Qatar səhər artıq bu stansiyaya sərnişin sıxlığı ilə gəlir və düşənlərdən çox minənlər olur. Bu zaman qatara həmin müddət ərzində minib-düşmə imkanları maksimum nəzərə alınır:

“Qatarın orada 1 dəqiqə dayanması problemi həll etməyəcək. Çünki minə biləcək sərnişinlər 30 saniyə ərzində artıq vaqonlara daxil olur. Ondan sonra sərnişinlə dolu qatarın stansiyada dayanıb gözləməsi də effektiv olmayacaq, əksinə, sərnişinlər daha çox narahat olacaq”.

Həmçinin oxu: Bakı metrosunun bu stansiyası bağlanacaq? - RƏSMİ

Onun fikrincə, son vaxtlar bu mənada müsbət tendensiyaya meyillilik hiss olunur. Bunun əsas səbəbi məhz sərnişinlərin ictimai fəal mövqe tutmasıdır:

“Bu məsələlərə daha həssas yanaşanların, mövqeyini bildirməkdən çəkinməyənlərin sayının artması müsbət haldır. Çünki istifadə qaydaları sərnişinlərə sadəcə qadağalar qoymur, həm də hüquqlar verir. Sərnişinlər vaqonda düşənlərə yol verəndə, qapı ağzında dayanmayanda, həmçinin stansiyada da eyni qayda ilə düşənlərə yol verəndə böyük problem yaşanmır.

Bunu, demək olar, hər gün müşahidə edirəm və sərnişinlər arasında bu təbliğat işini aparıram. Nəticədə bu, hamımızın marağındadır, həm də cəmiyyətdə qarşılıqlı hörmətin təməlidir. Təsəvvür edin ki, hər hansısa sərnişin tələsə-tələsə qarşısındakı itələyib onun əvəzinə vaqona girməyə çalışmayınca nizamlı hərəkət olur. Bir nəfərin “tələsirəm” deyib qarışıqlıq yaratması ilə nizam itir, avtomatik olaraq sərnişinlərin bir-birini itələməsi və qarışıqlığın yaranması müşahidə olunur. Amma kimsə həmin tələsən adama ciddi irad bildirəndə dərhal sakitlik yaranır. Bu halda qatarın qapısını tutub saxlanması isə nəticədə ümumi intervalın artması, qrafikin pozulmasına gətirib çıxarır. Bundan da bir sərnişin kimi hamımız əziyyət çəkirik”.

Metropoliten rəsmisinin fikrincə, bu kimi bir çox bəzi məsələləri metropoliten işçiləri ilə yanaşı, sərnişinlər də tənzimləməlidirlər. İlk növbədə isə platforma boyunca bərabər paylanmaya diqqət etməlidirlər.

Nazirlər Kabinetinin təsdiq etdiyi istifadə qaydalarında da sərnişinlərin qatarda və stansiyalarda minib-düşmə qaydalarına riayət etməli olduqları qeyd olunub.

Ramilə Qardaşxanqızı

BakuCity.az

Bakı metro sıxlıq
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər