Bakıda açıq reklam edilən tütün qızdırıcıları: qanun pozuntusu, yoxsa qanunda boşluq?

Bakıda açıq reklam edilən tütün qızdırıcıları: qanun pozuntusu, yoxsa qanunda boşluq?

"Qanunun icra olunmaması problemi mətbuatda qabardılmalıdır"

Bakıda elektron siqaretlər və ya tütün qızdırıcılarının (GLO) reklamı, satışı və qapalı məkanlarda istifadəsi halları getdikcə artır. Halbuki bütün növ qəlyanlar və elektron siqaretlər də “Tütün məmulatlarının istifadəsinin məhdudlaşdırılması haqqında” qanunun təsir dairəsində tütün məmulatlarına bərabər tutulur.

BakuCity.az Milli Məclisin Səhiyyə komitəsinin sədr müavini Musa Quliyevin məsələyə münasibətini öyrənib.

M.Quliyevin fikrincə, bu üsullarla gənclər sadəcə tütün məhsullarının aludəçisi olmur, həm də narkotik maddələrin istifadəçisinə çevrilirlər:

“Artıq dünya tibb elmi sübut edib ki, həm elektron siqaretlər, həm də sulu qəlyanlar adi tütün tərkibli siqaretlərdən dəfələrlə ziyanlıdır. Hətta ABŞ ötən ildən etibarən bir çox ştatlarında elektron siqaretlərin istehsalı və istifadəsini qadağan edib. O ki qaldı sulu qəlyanlara – bunlar da artıq bir çox dünya ölkələrində qadağan olunub. Sulu qəlyan təkcə ağciyəri və tənəffüs yollarına ziyan vurmur, həmçinin bir çox infeksion xəstəliklərin, o cümlədən vərəm xəstəliyinin sürətlə yayılmasına səbəb olur.

Eyni zamanda, artıq bu da sübut olunub ki, sulu qəlyan biznesi ilə məşğul olan bir çoxları bundan gizli şəkildə narkomaniyanın yayılması məqsədilə də istifadə edirlər. Sulu qəlyanların hazırlanmasında istifadə olunan bitkilərə marixuana və digər narkotik tərkibli maddələr qatırlar ki, bu da qısa müddət ərzində gənclərin özləri də bilmədən narkotik aludəçisi olmasına səbəb olur”.

Deputat sürətlə yayılan virus infeksiyalarına səbəb kimi sulu qəlyanların borularının dəyişdirilməməsini qeyd edib:

“Xüsusilə də ağız boşluğunda olan infeksiyalar bu vasitə ilə sürətlənir. Bəzən deyilir ki, qəlyanların ucluqları dəyişdirildiyi üçün xəstəlik yayıla bilməz, amma bu, səhv yanaşmadır. Çünki ucluqlar dəyişdirilsə də, borular heç vaxt dəyişdirilmir və boru vasitəsilə infeksiyalar sürətlə yayıla bilir. Həmçinin qəlyanın tüstüsü bir siqaretin tüstüsündən təxminən 200 dəfə çoxdur və təbii ki, qapalı məkanlarda qəlyandan istifadə etməyən insanlar da o tüstüdən əziyyət çəkmək məcburiyyətində qalırlar”.

Həmçinin oxu: Bakıda dəb halını alan "xəstəlik": siqareti tərgitməyə kömək, yoxsa asılılıq?

Onun sözlərinə görə, Azərbaycan qanunvericiliyi tütün məmulatlarının satışında istifadəçilərin həvəsləndirilməsi üçün atılan addımları qadağan edir, amma təəssüflər olsun ki, bu qanuna riayət edən yoxdur:

“Azərbaycan Respublikasınının qanunvericiliyində istər adi tütün məmulatları, istərsə də sulu qəlyan və elektron siqaretlərin reklamı və satışının stimullaşdırılması, qapalı məkanlarda istifadəsi qadağan olunub (http://www.e-qanun.az/framework/37481), amma təəssüf ki, bu qanuna tam əməl olunmur. Yaxşı olardı ki, bu qanunun özü və icra olunmaması problemi mətbuatda geniş qabardılsın”.

Qeyd edək ki, tütündən istifadənin nəticələrindən qorunma sahəsində bələdiyyələrin vəzifələrinə aşağıdakilər aiddir: 

- bələdiyyə ərazilərində vətəndaşların sağlamlığının ətraf mühitdəki tütün tüstüsünün təsirindən qorunmasına xidmət edən tədbirlərin həyata keçirilməsi və belə tədbirlərdə iştirak;

- bələdiyyə ərazisində tütündən istifadənin miqyasını müəyyənləşdirmək və istifadənin azaldılmasına nail olmaq məqsədi ilə həyata keçirilən və (və ya) planlaşdırılan tədbirlər haqqında əhalinin məlumatlandırılması;

- ətraf mühitdəki tütün tüstüsünün təsirinin qarşısının alınmasına və tütündən istifadənin nəticələrinin azaldılmasına yönəlmiş tədbirlərin monitorinqinin həyata keçirilməsi.

Bu gün paytaxda və ətraf ərazilərdə tütün məhsullarının açıq satışı, reklamı və qapalı məkanlarda istifadəsi göstərir ki, bələdiyyələr onlara tapşırılan vəzifəni icra etməkdə acizdirlər.

Araşdırmamız davam edir.

Ramilə Qardaşxanqızı

BakuCity.az

Bakı tütün siqaret reklam qanun
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər