Həbs edilən icra başçısının xanım müavini də tutulub Bakıya gətirildi

Həbs edilən icra başçısının xanım müavini də tutulub Bakıya gətirildi

İcra başçısının maaş kartlarını da mənimsədiyi bildirilir

Həbs olunduğu bildirilən Ağstafa Rayon İcra Hakimiyyətinin başçısı Nizaməddin Quliyevin daha bir müavini saxlanılıb.

BakuCity.az Bakupost-a istinadən xəbər verir ki, başçının müavini, eyni zamanda, İctimai-siyasi və humanitar məsələlər şöbəsinin müdiri Lalə Eyyubova bu gün hüquq-mühafizə orqanlarının əməkdaşları tərəfindən Bakıya gətirilib.

Qeyd edək ki, ötən gün Ağstafa Rayon İcra Hakimiyyətinin başçısı Quliyev Nizaməddin Məhəmməd oğlu və müavini Tatarov Ramiz Cahangir oğlu saxlanılıb.

Yayılan məlumatlara əasaən, ötən il Nazirlər Kabineti tərəfindən bütün rayonlarda 200-300 nəfərin minimum əməkhaqqı vermək şərtilə işə götürülməsi ilə bağlı qərarından sonra Goranboy Rayon İcra Hakimiyyətinin tabeliyində olan Təmizlik İdarəsinə də 300 fəhlə ştatı ayrılıb. Lakin N.Quliyev həmin ştatlara özünə yaxın müxtəlif vətəndaşların adını yazdıraraq onlara veriləcək maaş kartlarını özünə götürüb.

Goranboy şəhərində küçələrin asfaltlaşması üçün ayrılan vəsaitin də N.Quliyev tərəfindən mənimsənildiyi, nəticədə şəhərin mərkəzi küçəsindən başqa digər küçələrin təmirsiz qaldığı yazılır.

Xatırladaq ki, N.Quliyev 2009-2019-cu illərdə Goranboy Rayon İcra Hakimiyyətinin başçısı vəzifəsində çalışıb. Dövlət başçısının 5 aprel 2019-cu il tarixli sərəncamı ilə Goranboy Rayon İcra Hakimiyyətinin başçısı vəzifəsindən azad edilən N.Quliyev Ağstafa Rayon İcra Hakimiyyətinin başçısı təyin edilib.

Məlumata əsasən, icra başçısı Dövlət Təhlükəsizliyi Xidmətinin (DTX) keçirdiyi əməliyyat nəticəsində saxlanılıb. Onların ötən gecə saxlanılaraq Bakıya gətirildiyi, evlərində axtarış aparıldığı bildirilir. RİH-in digər işçilərinin ifadələrinin alındığı barədə də məlumatlar var. N.Quliyevin və müavininin külli miqdarda rüşvətə görə saxlanıldığı bildirilsə də, hələlik rəsmi məlumat verilmir.

BakuCity.az

Bakı icra hakimiyyəti həbs
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər