Bakıda dekabrda rekord isti 22,5 dərəcə olub

Bakıda dekabrda rekord isti 22,5 dərəcə olub

Şaxtalı, qarlı günlər azalıb

Azərbaycanda da, qonşu ölkələrdə olduğu kimi, dekabrda hava anomal isti keçir. Belə ki, qeydə alınan hava temperaturu daha çox oktyabrın sonu, noyabrın birinci ongünlüyü üçün səciyyəvidir.  Havanın orta temperaturu çoxilik normadan 3-4 dərəcə yuxarı olub.

BakuCity.az xəbər verir ki, bunu jurnalistlərə Ekologiya və Təbii Sərvətlər Nazirliyinin Milli Hidrometeorologiya Departamentinin direktoru Umayra Tağıyeva deyib.

Onun sözlərinə görə, bu ay ən yüksək temperatur dekabrın 24-də 15,4 dərəcə olub ki, bu da iqlim normasından 6,2 dərəcə yüksəkdir. Bununla yanaşı, son 20 ildə 2003-cü ilin 18 dekabr tarixində 22,5 dərəcə qeydə alınıb ki, bu da rekord göstəricidir:

“Çoxillik norma ilə müqayisədə yağıntının miqdarı da az olub. Əksər rayonlarda onların miqdarı aylıq normanın cəmi 6-54 faizini təşkil edib. Yalnız Abşeron yarımadasında yağıntının miqdarı iqlim normasına yaxın olub - 76-115%”.

U.Tağıyeva əhalinin daha uzun müddətli proqnozlara marağını nəzərə alaraq, yanvar ayında gözlənilən hava şəraitinin ümumi tendensiyası haqqında da danışıb:

“Adətən Bakıda havanın orta minimal temperaturu müsbət 2-4 dərəcəyə yaxın olur. Çoxillik məlumatlara əsasən, 1961-ci ildən başlayaraq yalnız 4 dəfə (1964 - 1,10С; 1969 - 0,40 С; 1972 -2,30С; 1977 - 1,20С) orta minimal temperatur mənfi olub. Son 30 ildə isə yalnız bir dəfə - 2008-ci ildə mənfi orta minimal temperatur qeydə alınıb (-1,4).

Ümumiyyətlə, ölkə üzrə dağlıq və dağəyi rayonlarda şaxtalı günlərin, o cümlədə qarlı günlərin sayının azalması müşahidə edilir. Ümumdünya Meteorologiya Təşkilatının xüsusiləşdirilmiş mərkəzlərinin məlumatına əsasən, bizim regionda temperatur rejimində müsbət anomaliyanın üstünlüyü, yağıntıların isə, bəzi şərq rayonları istisna olmaqla, normadan az olacağı gözlənilir”.

Bakıda dekabrda rekord isti 22,5 dərəcə olub, fotoşəkil-1

Ramilə Qardaşxanqızı

BakuCity.az

Bakı Umayra Tağıyeva rekord isti
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər