Qayda pozmayan sürücülər mükafatlandırılacaq? - VİDEO

Qayda pozmayan sürücülər mükafatlandırılacaq? - VİDEO

"Söhbət təkcə maddi həvəsləndirmədən getmir"

Dünya ölkələrində il ərzində və ya daha çox müddətdə qayda pozmayan nümunəvi sürücülərin mükafatdırılması təcrübəsi var. Azərbaycanda rəsmi şəkildə belə mükafatlandırma mexanizmi olmasa da, Dövlət Yol Polisinin məlumat bazasında nümunəvi sürücülər barədə məlumatlar toplanır.

BakuCity.az xəbər verir ki, mövzu ilə bağlı ARB TV-nin “Günə doğru” proqramında bəhs olunub.

Bakı Şəhər Baş Dövlət Yol Polisi İdarəsinin bölmə rəisi Vaqif Əsədov deyib ki, mərkəzi məlumat sistemində törədilən xəta ilə bağlı heç bir informasiya yoxdursa, bu, yaxşı hal hesab edilir:

“Həmin şəxsin yol hərəkətində nümunəvi hərəkət etməsi üzə çıxır. Bizim tərəfimizdən 10-larla belə sürücü müəyyən edilib”.

Bu məlumatlar əsasında qaydaları pozmayan sürucülər vaxtaşırı müxtəlif QHT-lər tərəfindən mükafatlarla həvəsləndirilir.

Ekspert Ərşad Hüseynovun sözlərinə görə, nisbətən dəqiq meyarlarla, cəmiyyətdə sorğu keçirməklə, həmin sürücünün fəaliyyətini qiymətləndirməklə kimlərisə nümunə göstərmək olar.

Ə.Hüseynov bildirib ki, söhbət təkcə maddi həvəsləndirmədən getmir:

“Bu da olsa, çox gözəl olar. Aidiyyəti şəxsə rəhbər şəxsin imzası ilə təşəkkürnamə verilir. Sadə bir şeydir, amma ömrü boyu yadında saxlayar. Bu, çox yaxşı PR mövzusuna çevriləcək ki, belə bir sürücü idi, heç bir intizamsızlığı yoxdur. Üstəgəl, belə bir şəraitdə alicənablıq göstərib”.

Ekspert Elməddin Muradlı isə qeyd edib ki, bu, Azərbaycan reallığında inandırıcı deyil:

“Tək-tük sürücü ola bilər ki, iki il ərzində heç bir xəta törətməsin. Bu, həm onlar üçün bir motivasiya olar, həm də digər sürücülərə stimul verər. Digərlərində də belə bir fikir formalaşar ki, elə edim, mən də o siyahıda olum”.

Ekspertlərin fikrincə, yaxşı olar ki, hərəkətin təhlükəsizliyinin təmin olunmasında iştirak edən qurumlar da belə təbliğatlarda iştirak etsin. Bununla yanaşı, seçim mexanizmi daha obyektiv və şəffaf olmalıdır.

BakuCity.az

Bakı sürücü mükafatlandırma
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər