Yandırılan 10 yaşlı Nərminin atası danışdı: "Özüm qızımı göndərdim ki..."

Yandırılan 10 yaşlı Nərminin atası danışdı: "Özüm qızımı göndərdim ki..."

Qətlin kim tərəfindən törədildiyi məlum deyil

Xəbər verildiyi kimi, ötən ilin noyabrında Tovuz rayonununda itkin düşmüş 10 yaşlı Nərmin Quliyevanın meyiti Dondar Quşçu kənd ərazisindəki boş sahədə yandırılmış halda aşkarlanıb.

BakuCity.az xəbər verir ki, Modern.az-ın əməkdaşları Nərminin atası Şərif Quliyevlə həmsöhbət olub.

Hazırda hadisə yerində olduğunu deyən Ş.Quliyev baş verənlərə hələ də inanmadığını bildirib:

“Hazırda hadisə yerindəyik. Bakıdan ekspert qrupunun gəlişini gözləyirik. Bütün polis əməkdaşları, rəis, İcra Hakimiyyətinin nümayəndələri, kənd camaatı hadisə yerindədir. Heç meyiti yerindən tərpətməmişik.

Həmçinin oxu: Tovuzda 10 yaşlı Nərminin dəhşətli ölümü ilə bağlı TƏFƏRRÜATLAR - VİDEO

Baxdıq, üstündəki paltarları yanıb. Nə baş verdiyini daha detallı araşdırmadan sonra öyrənəcəyik”.

Ş.Quliyev qeyd edib ki, qohum-qonşuda şübhələndiyi kimsə yoxdur:

“Biz kiminləsə ədavəti olan adam deyilik. Öz halımızda, güzəranımızda yaşayan adamlarıq. Hadisə qardaşımın uşağının toyundan bir gün sonra - 21 noyabrda olub. Gödəkçəm qardaşımgildə qalmışdı. Özüm qızımı göndərdim ki, getsin, gödəkçəmi gətirsin. Gödəkçəni evdən götürüb küçəyə çıxandan sonra da yoxa çıxıb.

Mən bu işin axırına kimi gedəcəyəm. Necə olur-olsun, qızıma qarşı törədilmiş cinayətin aşkara çıxması üçün əlimdən gələni edəcəyəm. Mətbuat nümayəndələrindən bu işə diqqət yetirmələrini xahiş edirəm”.

Xatırladaq ki, 2019-cu il noyabrın 21-də itkin düşən Tovuz rayon sakini, 2010-cu il təvəllüdlü Nərmin Şərif qızı Quliyevanın meyiti Dondar Quşçu kəndi ərazisindəki boş sahədə yandırılmış halda aşkarlanıb.

Qətlin kim tərəfindən törədildiyi hələlik məlum deyil.

Faktla bağlı Tovuz rayon Prokurorluğunda Cinayət Məcəlləsinin müvafiq maddələri ilə cinayət işi açılıb, araşdırma aparılır.

BakuCity.az

qətl qız Tovuz
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər