VÖEN ilə işləyənlərin nəzərinə - Ödənişlər artdı

VÖEN ilə işləyənlərin nəzərinə - Ödənişlər artdı

Bu məbləğ minimum əməkhaqqının 25%-i qədər olacaq

Azərbaycanda sahibkarların Dövlət Sosial Müdafiə Fonduna (DSMF) ödənişləri artıb.

BakuCity.az FED.az-a istinadən xəbər verir ki, bu, 2019-cu ildə “Sosial sığorta haqqında” qanuna edilən və 2020-ci ildə qüvvəyə minən dəyişikliklərlə bağlıdır. Qanunun 14.5.1-ci maddəsinə edilən dəyişikliyə əsasən, 2020-ci ildən etibarən sahibkarlar DSMF-yə fəaliyyətlərindən asılı olaraq, yəni minimum aylıq əməkhaqqının tikinti və ticarət sahələrində 50%-i, digər sahələrdə 25%-i miqdarında ödəniş edəcəklər.

Bu o deməkdir ki, ödənişlər artıq yanvarın 1-dən qüvvəyə minmiş hesab olunur və yanvar üzrə MDSS (məcburi dövlət sosial sığorta) ödənişləri fevralın 15-nə qədər ödənməlidir.

Başqa sözlə, indiyədək Bakıdakı sahibkarlar DSMF-yə ayda 50 manat ödəniş edirdilərsə, yanvarın 1-dən bu məbləğ minimum əməkhaqqının 25%-i qədər, yəni 62,5 manat (minimum əmək haqqı 250 manat) olacaq.

Respublikanın digər bölgələrində artım daha yüksək olacaq. Belə ki, cari ildən etibarən təkcə ödənişin dərəcəsi deyil, bu ödənişin məbləği ilə bağlı Bakı və digər regionlar arasındakı fərq də aradan qalxır. Belə ki, DSMF-yə ödəniş Bakıda 50 manat olduğu halda, Sumqayıt və Gəncədə 45 manat, respubilka tabeli şəhərlərdə 40 manat, rayon mərkəzlərində 30 manat, kənd yerlərində isə 25 manat təşkil edirdi. Yanvarın 1-dən etibarən isə bütün ölkə üzrə bu məbləğ 62,5 manat olub.

Təqribən eyni dəyişikliklər tikinti və ticarətlə məşğul olan sahibkarlara da aid olacaq. Qanuna görə, bu fəaliyyətlə məşğul olanlar minimum əməkhaqqının (yəni 250 manatın) 50%-i qədər ödəniş etməlidirlər. Bakıda bu məbləğ indiyədək də 125 manat, Sumqayıt və Gəncədə 112,5 manat, respubilka tabeli şəhərlərdə 80 manat, rayon mərkəzlərində 75 manat, kəndlərdə isə 62,5 manat idi. Yanvarın 1-dən isə bu ödənişin məbləği də bütün ölkə üzrə eyni olacaq - 125 AZN.

BakuCity.az

VÖEN sığorta ödəniş
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər