Ramana qalası bir ailənin ümidinə qalıb: “Düşmən çəpəri”miz niyə unudulur? - VİDEO

Ramana qalası bir ailənin ümidinə qalıb: “Düşmən çəpəri”miz niyə unudulur? - VİDEO

"Bakıətrafı qalaların təmiri gələcək üçün nəzərdə tutulub"

Ramana, Nardaran, Bilgəh, Mərdəkanın dördkünc və dairəvi qalaları...  Tarixə şahidlik edən bu tiklilər Abşeronun əhəmiyyətli abidələri sırasınadır. Amma nədənsə əksəriyyətimiz Bakı və Bakı ətrafındakı bu qalalar haqqında az məlumatlıyıq.

BakuCity.az xəbər verir ki, səbəbini Azərbaycan Televiziyasının əməkdaşı Ramana qalası fonunda araşdırıb, sözügedən tikilinin vəziyyəti ilə maraqlanıb.

Ramana qalasının nə dəqiq tarixi bəllidi, nə də hansı məqsədlə inşa edildiyi. Bəlli olan isə budur ki, Ramana qalası tarixin bizə bəxş etdiyi əhəmiyyətli abidələr sırasınadadır. Qalanın daş kitabəsinin itməsi onun haqqında dəqiq məlumatlar əldə etməyi çətinləşdirir.

İlk baxışdan sadə görünən bu əzəmətli divarlar əsrlər boyu neçə-neçə sakini düşməndən qoruyub. Ağ daşdan tikilən müdafiə qalası Şirvanşahlar dönəmində qəsr kimi də fəaliyyət göstərib. Hazırda isə buranın qorunması, demək olar ki, yaxınlıqda yaşayan ailənin ümidinə qalıb.

Koroğlu, Nəsimi, Babək filmlərinin çəkilişlərinə şahidlik edən qalanın inşasında dəvə yunundan və yumurtanın ağından da istifadə olunub. 1950-ci ildə restavrasiya edilsə də, daxilində təmir işləri aparılmayıb.

Ümumi hündürlüyü 15 metr olan qalada mərtəbələr arasında dolama pilləkənlərdən istifadə edilib. Dövrünün ən mükəmməl­ istehkamlarından biri olmasına baxmayaraq, bu gün qismən unudulub. Hazırda qalanın yuxarısına çıxmaq müşkül məsələdir.  Üst mərtəbədəki döşəmənin­ uçması  digər daş pilləkənə keçməyə imkan vermir.

Tədqiqatçılar bildirirlər ki, nəinki Ramana qalası, eləcə də ətrafda yerləşən digər qalalar bərpa olunaraq turistik məkana çevrilə bilər. Lakin hazırda Ramana qalasının movcud vəziyyəti buna imkan vermir.

Dövlət Turizm Agentliyinin nümayəndəsi Emil Məmmədov deyir ki, əslində Avropa və MDB ölkələrindən gələn turistlər Azərbaycanın tarixi məkanları, xüsəsən də Bakıətrafı qalalarla çox maraqlanırlar. Tək məsələ bu məkanların turistlərin ziyarətinə hazır vəziyyətə gətirilməsidir. Mədəniyyət Nazirliyinin rəsmisi isə deyir ki, Bakıətrafı qalaların təmiri gələcək üçün nəzərdə tutulub.

Onu da qeyd edək ki, Ramana qalası 2001-ci ildə UNESCO-nun Təcili Qorunmaya Ehtiyacı olan Maddi-Mədəni İrsin ilkin siyahısına daxil edilib.

BakuCity.az

Bakı Ramanı qala
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər