Bakıda II Qəhvə və Çay Festivalında hansı yeniliklər gözlənilir? - AÇIQLAMA

Bakıda II Qəhvə və Çay Festivalında hansı yeniliklər gözlənilir? - AÇIQLAMA

“Baku Coffee & Tea Festival 2020” əsl Çay və Qəhvə bayramı olacaq

24-26 yanvar tarixində bu ilin çoxdan gözlənilən ən böyük tədbiri - "Baku Coffee & Tea Festival Vol.2" keçiriləcək.

BakuCity.az xəbər verir ki, üç günlük festival Nigar Rəfibəyli küç., 12/14 ünvanında yerləşən "Passage 1901”-də Beynəlxalq Qəhvə Birliyinin (Specialty Coffee Association) dəstəyi ilə reallaşacaq.

Saytımıza açıqlamasında "SCA (Specialty Coffee Association) Azerbaijan"ın marketinq üzrə koordinatoru Aynur Tağıyeva festival barədə bəzi məqamlara toxunub:

“Keçən il birinci dəfə idi ki, böyük kütləni əhatə edən bir festival təşkil etmək qərarına gəldik. Festival çox böyük marağa səbəb oldu və üç gün boyunca qonaqların ardı-arası kəsilmədi. Baxmayaraq ki, Azərbaycan xalqı, əsasən, çaya üstünlük verən xalqdır, festivalda qəhvəyə maraq da böyük idi. Keçənilki festivalın uğuru biz təşkilatçılara (SCA Azerbaijan) stimul verdi ki, ikinci Baku Cofffe&Tea Festival”ı təşkil edək".

Ötənilki festivalla builki festivalın fərqinə gəlincə, A.Tağıyeva qeyd edib ki, keçən il festival çərçivəsində bir çempionat təşkil edildi, bu dəfə isə iki çempionat keçiriləcək:

“Keçənilki çempionatın qalibi Məryəm xanım Bostonda keçirilən dünya çempionatında ölkəmizi təmsil etdi. Azərbaycan barista birinci dəfə idi ki, dünya arenasına çıxırdı. Builki festivalda isə iki çempionat keçiriləcək - Milli Barista Çempionatı və Milli Latte-art çempionatı. Qaliblər Azərbaycanı bu ilin yay aylarında Polşanın Varşava və Avstraliyanın Melburn şəhərlərində keçiriləcək dünya çempionatlarında təmsil edəcəklər. Builki festivalda keçənilki festivalda iştirak edən qəhvə və çay şirkətlərinə daha yeniləri əlavə edildi və inanıram ki, indiki festival da ötənilki festival kimi uğurlu olacaq. Bu dəfə qonaqların sayının 10 000-i aşacağını proqnozlaşdırırıq. Bütün qəhvə və çay sevərləri festivala dəvət edirəm”.

Festivalın əsas məqsədi çay və qəhvə sənayəsinin, biznesin inkişafı üçün keyfiyyətli fürsətlərin yaradılması, perspektivli əməkdaşlıq və təcrübə mübadiləsi, festival çərçivəsində və Beynəlxalq Qəhvə Birliyinin dəstəyi ilə (Specialty Coffee Association) barista arasında iki milli çempionat keçiriləcək.

Çempionatların qalibləri ixtisaslaşmış hakimlərdən ibarət beynəlxalq kollegiya tərəfindən seçilərək Azərbaycanı 2020-ci ilin dünya çempionatlarında təmsil edəcəklər.

Festivalın çoxsaylı qonaqlarını qəhvə və çay istehsalı və idxalı ilə məşğul olan şirkətlərin sərgisi - aksesuarlar və avadanlıqlar, barista arasında milli çempionatlar, aparıcı mütəxəssislər tərəfindən keçirilən seminar və master-klasslar, ödənişsiz kofe bar, istirahət zonası (lounge zona), uşaq əyləncə məkanı, “Barista Party” (yalnız dəvətnamə ilə) gözləyir.

Tədbir 24, 25, 26 yanvar tarixlərində saat11:00-dan 19:00-a kimi davam edəcək. Giriş sərbəstdir.

Qeyd edək ki, festivalın informasiya tərəfdaşı BakuCity.az saytıdır.

Ramilə Qardaşxanqızı

BakuCity.az

Bakı qəhvə və çay festival
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər