Bakı Zooparkının açılış vaxtı bilindi - Daha böyük və maraqlı olacaq

Bakı Zooparkının açılış vaxtı bilindi - Daha böyük və maraqlı olacaq

Zoopark tamamilə yenidən tikilir

Paytaxtda turistlər və sakinlərin ən çox üz tutduğu yerlərdən biri olan Bakı zooparkındakı tikinti işləri yay aylarının sonunda başa çatacaq.

BakuCity.az-ın məlumatına görə, bunu Baku.ws-ə Bakı Zooloji Parkının tikinti-layihə rəhbəri Ramin Vəliyev bildirib.

Onun sözlərinə görə, Bakı zooparkı tamamilə sökülüb və yenidən tikinti işləri aparılıb:

“Bildiyiniz kimi, Bakı zooparkı Heydər Əliyev Fondunun vitse-prezidenti, IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin təsisçisi və rəhbəri Leyla Əliyevanın təşəbbüsü ilə yenidən tikilir. Biz yenidənqurma işləri ilə məşğuluq. Bakı zooparkı tamamilə söküldü və yenidən tikinti işləri aparılır.

Yay aylarının sonunda zoopark hazır olmalıdır. Hazırda layihələndirmə işləri gedir. Dünya zooparkları ilə işlər aparılır, hamısında nümayəndələrimiz olub. Bakı zooparkı heç birinin oxşarı və təkrarı olmayacaq. Təbii təcrübə kimi beynəlxalq standartlardan istifadə olunur. Keçmiş zooparkdan heç nə qalmayıb və yenisi çox gözəl görkəmdə olacaq. Ərazisi də 4,5 hektar olub.

Əvvəl heyvanların saxlanma yeri az idi, indi isə daha çox olacaq. Amma dəqiq sayı demək mümkün deyil. Biz Avropa Heyvanlar Assosiasiyasına daxil olmaq istəyirik. Ora daxil olandan sonra heyvanlar mübadiləsi gedir. Amma əlavə valyerlər tikilir ki, gələcəkdə heyvanların sayı artırılsın”.

Layihə rəhbəri deyib ki, zoopark ərazisində həm də 60 uşağın iştirak edə biləcəyi seminar zalı fəaliyyət göstərəcək:

“Yeni zooparkın içində uşaqlar və turistlər üçün restoranlar, əyləncə mərkəzləri fəaliyyət göstərəcək. Bunlar barədə ətraflı danışa bilməsək də, amma yeni zoopark olduğundan iki dəfə böyüyəcək və çox maraqlı olacaq.

Yeni zooparkda biz insanların yerini məhdudlaşıdırıb, heyvanların yerini genişləndirmişik. Əvvəllər heyvanlar qəfəslərdə və bağlı bir məhdud yerdə idi, insanlar isə açıq yerdə idi. İndi tamamilə fərqlidir, insanların yeri məhduddur, macəra körpümüz var. Sürpriz olsun deyə, bunlar barədə ətraflı danışmırıq. Elə şərait qurulub ki, heyvanlar açıq bir şəkildə təbiətə uyğun yaşasın.

Yeni zooparkın tikintisi başa çatdıqdan sonra heyvanları yenidən məkana qaytarmaq və yerləşdirmək 1-2 ay müddət çəkəcək. Heyvanlar ilkin mərhələdə zooparkda adaptasiya prosesi keçəcək. Daha sonra yeni zooparkda mümkün qüsur və çatışmazlıqların aradan qaldırılmasına baxacağıq. Bu proses tam başa çatdıqdan sonra zoopark istifadəyə veriləcək”.

BakuCity.az

Bakı zoopark
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər