Müəllimlərdən 200 manat yığan direktor vəzifəsindən uzaqlaşdırılıb? - Məktəb təsdiq, İdarə təkzib edir

Müəllimlərdən 200 manat yığan direktor vəzifəsindən uzaqlaşdırılıb? - Məktəb təsdiq, İdarə təkzib edir

Araşdırma aparılır

53 nömrəli tam orta məktəbin direktoru vəzifəsindən uzaqlaşdırılıb.

BakuCity.az xəbər verir ki, bu barədə Qaynarinfo-ya sözügedən məktəbdən bildirilib.

Məktəbdən verilən məlumata görə, məktəbin direktoru Firəngiz Həmidova müvəqqəti olaraq vəzifəsindən uzaqlaşdırılıb:

"Firəngiz xanım vəzifəsindən kənarlaşdırılıb. Yerinə də başqa adam təyin olunub. Hazırda araşdırma aparılır”.

Bakı Şəhəri üzrə Təhsil İdarəsinin mətbuat katibi Bəşarət Məmmədov isə 53 nömrəli məktəbin direktoru F.Həmidovanın hazırda vəzifəsini icra etdiyini bildirib:

"Bakı şəhəri 53 nömrəli tam orta məktəbdə aparılan araşdırma zamanı məktəbin ötən tədris ili məzunu (IX sinif), ABŞ-da təhsil aldığı bildirilən Nigar Bayramlının adının məktəbin sinif jurnalında qeyd olunması (X sinif şagird kontingentinə daxil edildiyi üçün) və qiymətləndirmə aparılması faktı aşkar edilib. Ölkə hüdudlarından kənarda olan N.Bayramlının adının müvafiq qaydalara zidd olaraq məktəbin sinif jurnalında qeyd olunmasının və qiymətləndirilməsinin yolverilməz olduğu nəzərə alınaraq, fakt müvafiq qaydada rəsmiləşdirilib. Faktın bütün təfərrüatlarına dair Bakı Şəhəri üzrə Təhsil İdarəsi tərəfindən müvafiq araşdırma davam edir. Araşdırmanın nəticələri haqqında əlavə məlumat veriləcək”. 

Qeyd edək ki, Oxu.az-ın məlumatına görə, Bakı şəhəri 53 nömrəli orta məktəbdə saxtakarlıq faktı aşkarlanıb:

"Məktəbdə ötən dərs ilində IX sinfi bitirmiş Nigar Bayramlı bu dərs ilində ABŞ-da təhsilini davam etdirir. İddiaya görə, buna baxmayaraq, onun adı 53 nömrəli məktəbin X sinif şagirdi kimi saxlanılıb. Şagirdin adı I yarımildə sinif jurnalında yazılaraq davamiyyəti qeyd edilib. Məktəbin direktoru Firəngiz Həmidova bunun ciddi saxtakarlıq, hətta cinayət tərkibli olduğunu bilsə də, şagirdin "kağız üzərində təhsil almasına” şərait yaradıb. 

F.Həmidova bu işdən "qurtulmaq” adı altında bütün müəllimlərdən adambaşına 150-200 manat yığıb. Bir sözü iki olmayan direktorun bu yığım reydi halal əməkhaqqı ilə dolanan müəllimləri özündən çıxarıb və hadisə ictimailəşib".

BakuCity.az

məktəb direktor
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər