Badamdar sürüşmə sahəsində görüləcək işlər açıqlandı - Ərazidən REPORTAJ

Badamdar sürüşmə sahəsində görüləcək işlər açıqlandı - Ərazidən REPORTAJ

Yanvarın 9-da sürüşmə sahəsi yenidən aktivləşib

Badamdar qəsəbəsində aktivləşən sürüşmənin fəsadlarını aradan qaldırmaq, eləcə də analoji hadisənin təkrarlanmaması üçün ərazidə yeraltı suların axıdılması məqsədilə quyular qazılacaq. Görüləcək işlərlə bağlı layihə hazırlanıb.

BakuCity.az AzTV.az-a istinadən xəbər verir ki, sürüşmə baş verən ərazinin yuxarı hissəsində üç quyu qazılacaq. Dərinliyi 30 metr olacaq quyuları daxildən bərkitmək üçün metal lövhələrdən istifadə ediləcək. Yaponiyadan metal lövhələr gəldikdən sonra quyuların qazılmasına başlanılacaq.

“Azər İnşaat” layihə institutunun şöbə rəisi Samir Vəliyev deyir ki, sözügedən ərazidə terraslar yaradılacaq, daha sonra aşağı hissədən artıq kütlə hissə-hissə çıxarılacaq.

Quyuların daxilinə texnika - qazma aqreqatı qoyulmaqla yanaşı, 50 metr uzunluğunda filtrlər çəkiləcək. Su filtrlərə daxil olub oradan quyuya axacaq. Çəkiləcək xətt vasitəsilə su kollektora ötürüləcək.

Ərazidə müvəqqəti olaraq qazılan 13 ədəd drenaj quyusunda bərpa işləri aparılıb, nasoslar işə salınıb. 100-150 metr dərinliyində olan quyulardan 6-sı işləyir, yaxın günlərdə isə 5 quyu da aktivləşdiriləcək. Bu, vəziyyətin stabilləşməsinə imkan yaradacaq. Aradan qaldırılması planlaşdırılan digər bir məqam isə kanalizasiya xətləri ilə bağlıdır.

Belə ki, sürüşmə baş verən ərazinin yuxarı hissəsində yerləşən 7 yaşayış evinin kanalizasiya xətti yoxdur. Vəziyyətdən çıxış yolu isə odur ki, həmin evlərin kanalizasiya xətti müvəqqəti olaraq sahədən kənarlaşdırılsın. Artıq bu məsələ ilə bağlı layihə hazırdır. Yaxın günlərdə işlərə başlanılacaq.

Əsas məqsəd ərazidə yeraltı suların axınını təbii prosesə çevirməkdir.

Xatırladaq ki, yanvarın 9-da Badamdar sürüşmə sahəsində yenidən aktivləşmə baş verib. Eni təxminən 100 metrə yaxın olan sürüşmə kütləsi Badamdar - 20-ci sahə arasında olan magistral avtomobil yoluna doğru hərəkət edərək yolu bağlayıb.

BakuCity.az

Badamdar sürüşmə sahəsi
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər