Bakıdakı Çin restoranları diqqət mərkəzində: Koronavirus onlardan da yan keçməyib? - YENİLƏNİB

Bakıdakı Çin restoranları diqqət mərkəzində: Koronavirus onlardan da yan keçməyib? - YENİLƏNİB

Bəzi restoranlar məlumat verməkdən yayındı

Çində yayılan koronavirusla əlaqədar olaraq Azərbaycanda da qabaqlayıcı tədbirlər gücləndirilib. Bəzi məlumatlara görə, bu virusun daşıyıcısı olan insanın təması nəticəsində əşya və qidalar vasitəsilə də yayılma təhlükəsi var. Belə olan halda Bakıda Çin mətbəxi nümunələri təqdim edən restoranlar da diqqət mərkəzinə düşür.

Mövcud vəziyyəti araşdırmaq üçün BakuCity.az saytı paytaxtda fəaliyyət göstərən Çin restoranları ilə əlaqə yaratmağa çalışıb.

“Jasmine” restoranından bildirilib ki, onların fəaliyyətinə heç bir məhdudiyyət qoyulmayıb və iaşə müəssisəsi əvvəlki qaydada işini davam etdirir:

“Yayılan məlumatlar fəaliyyətimizə heç cür təsir göstərməyib. Müştərilər indi də restoranımıza gəlməyə davam edirlər. Bir sözlə, məkanda müştəri qıtlığı yaşanmır”.

Həmçinin oxu: Azərbaycanda koronavirusla bağlı son vəziyyət açıqlanıb - RƏSMİ

“Çinar” restoranından deyiblər ki, məhsulların hamısı Niderlanddan alınır:

“Restoranımız sırf Çin mətbəxi deyil, qarışıq Asiya mətbəxi ilə xidmət göstərir. Burada Çin, Yaponiya, Malayziya, Sinqapur və s. mətbəx nümunələri verilir. Ümumiyyətlə, koronavirusla əlaqədar olaraq müştərilərin azaldığını deməzdik, amma şəhərə turist axınının azalması ilə məkanımıza gələn xarici qonaqların da azalması müşahidə olunur. Restorana müvafiq qurumlar tərəfindən ümumiyyətlə baxış keçirilməyib”.

“Shin Shin”dən isə qeyd ediblər ki, məkan müdiriyyət tətildə olduğuna görə müvəqqəti olaraq bağlıdır, növbəti ayın 1-dən etibarən fəaliyyətə başlayacaq. Yoxlanışa gəlincə, Azərbaycan Qida Təhlükəsizliyi Agentliyi tərəfindən bir qayda olaraq restorana hər gün baxış keçirildiyi deyilib.

“Fan nang”, “Hong-Kong”,  “Asian Street Food” kimi restoranlar isə ümumiyyətlə məlumat verməkdən yayınıblar.

Qeyd edək ki, Azərbaycanda yeni koronavirus xəstəliyinə qarşı profilaktik tədbirlərin gücləndirilib. Bu məqsədilə Elmi-Tədqiqat Ağciyər Xəstəlikləri İnstitutunda 8 xüsusi palata ayrılıb. Həmçinin sərhəd-keçid məntəqələrində gücləndirilmiş iş rejiminə keçilib; Çindən bir sıra məhsulların gətirilməsinə qadağa qoyulub.

Ramilə Qardaşxanqızı

BakuCity.az

Bakı koronavirus Çin restoranları
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər