Polis “Hollywood Cinema Club”la bağlı şikayəti nazirliyə göndərdi

Polis “Hollywood Cinema Club”la bağlı şikayəti nazirliyə göndərdi

"Müştərilər küçədə sərxoş halda mahnı oxuyub, rəqs edirlər"

Bakıda “Hollywood Cinema Club”un üzərindəki yaşayış binasının sakinləri adından edilən şikayətlə bağlı müvafiq araşdırmalar aparılıb.

Bu barədə BakuCity.az-a Bakı şəhər Baş Polis İdarəsinin Mətbuat Xidmətinin rəisi, polis mayoru Elşad Hacıyev bildirib.

Onun sözlərinə görə, araşdırma zamanı məlum olub ki, bu şikayətin səbəbi sahibkarlıq subyektinin sahibi ilə aralarında yaranan əmlak alqı-satqısına görə anlaşılmazlıqdır. 

E.Hacıyev deyib ki, sahibkarlıq subyektində hazırda təmir-bərpa işləri aparılır, səsin kənara çıxmaması üçün ötən ilin noyabrından izolyasiya işlərinə başlanılıb, hazırda bu istiqamətdə işlər davam etdirilir:

“Vətəndaşların şikayətlərinə baxılmaması ilə bağlı iddialar əsassızdır, daxil olan bütün müraciətlər üzrə araşdırmalar aparılmaqla, inzibati xəta tərkibi yaradan hallarla bağlı protokol tərtib olunub. Sahibkarlıq subyektində sakinlərin narahatlığına səbəb olan halların tam aradan qaldırılması üçün Ekologiya və Təbii Sərvətlər Nazirliyinin müvafiq departamentinə müraciət olunub. Tərəfimizdən araşdırmalar davam etdirilir”.

Qeyd edək ki, saytların birində dərc olunan xəbərdə Badamdar qəsəbəsi, 77 ünvanında yerləşən “Hollywood Cinema Club”un yerləşdiyi yaşayış binasının sakinləri bildiriblər ki, obyektin müştərilərinin səhərə kimi yüksək səsli musiqi altında əylənir, daha sonra çıxıb küçədə sərxoş halda mahnı oxuyub, rəqs edirlər. Sakinlərin sözlərinə görə, məsələ ilə bağlı dəfələrlə 102 xidmətinə zəng edərək şikayət ediblər.

BakuCity.az

Bakı Hollywood Cinema Club polis şikayət
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər