Bakıda zərgərlik bazarının inkişaf perspektivləri müzakirə olunub

Bakıda zərgərlik bazarının inkişaf perspektivləri müzakirə olunub

Azərbaycan qızılından hazırlanan məhsullar bir ildir satışa çıxarılıb

Fevralın 18-də “Azərbaycanda zərgərlik bazarının inkişaf perspektivləri: problemlər və imkanlar” mövzusunda sahibkarlarla görüş keçirilib.

BakuCity.az xəbər verir ki, görüşdə İqtisadiyyat Nazirliyi, Dövlət Gömrük Komitəsi (DGK), “AzerGold” QSC, Kiçik və Orta Biznesin İnkişafı Agentliyi (KOBİA), Türkiyə və Özbəkistanın qiymətli metallar üzrə ixtisaslaşmış strukturlarının nümayəndələri və sahibkarlar iştirak ediblər.

Tədbirdə çıxış edən İqtisadiyyat naziri Mikayıl Cabbarov dağ-mədən sənayesinin inkişafının ölkə iqtisadiyyatının şaxələndirilməsinin mühüm istiqamətlərindən biri olduğunu deyib.

O bildirib ki, zərgərlik sənayesində islahatların aparılması və əlverişli coğrafi mövqeyə, müasir nəqliyyat-logistika infrastrukturuna malik Azərbaycanın bu sahədə regional mərkəzə çevrilməsi əsas hədəflərdən biridir.

DGK sədri Səfər Mehdiyev zərgərlik sahəsinin inkişafı üçün dövlət-biznes dialoqunun aparılmasının, mövcud çətinliklərin müzakirəsinin önəmini vurğulayıb.

“AzerGold” QSC-nin sədri Zakir İbrahimov Azərbaycanın zəngin zərgərlik ənənələrinə malik olduğunu deyib. O, Azərbaycan qızılı və gümüşündən hazırlanan məhsulların ötən ilin fevral ayından pərakəndə satış bazarına çıxarıldığını bildirib.

KOBİA-nın İdarə Heyətinin sədri Orxan Məmmədov zərgərlik bazarında fəaliyyət göstərən kiçik və orta sahibkarların fəaliyyəti, bu sahədə biznesin qarşılaşdığı məsələlərə toxunaraq, sahənin inkişafı ilə bağlı təkliflərini səsləndirib.

Tədbir çərçivəsində zərgərlik sənayesinin gələcək inkişaf istiqamətlərinə dair müzakirələr aparılıb, bu sahədə islahatların həyata keçirilməsi üçün təkliflər planının hazırlanması üzrə işçi qrupunun yaradılması qərara alınıb.

BakuCity.az

Bakı zərgərlik sahibkarlar
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər