Tanınmış modelyer Gülnarə Xəlilovadan 8 Mart məsləhəti: “Ən böyük trend zövqlü olmaqdır”

Tanınmış modelyer Gülnarə Xəlilovadan 8 Mart məsləhəti: “Ən böyük trend zövqlü olmaqdır”

“Ən böyük gözəllik sağlamlıqdır”

Ümumilikdə bayram ayı kimi qəbul edilən mart ayının gəlişini, demək olar, hər kəs səbirsizliklə gözləyir. Xanımlar üçün isə bu ay xüsusi əhəmiyyət kəsb edir. Çünki bu ayın ilk bayramı məhz 8 Mart – Beynəlxalq Qadınlar Günüdür. Həmin gün bütün qadınlar həm cazibədar, həm də fərqli görünmək istəyir. Necə deyərlər, gözəllik ondursa, doqquzu dondur. 

Bəs zərif cinsin nümayəndələri bayramı daha gözəl, yaddaqalan keçirmək, həmin gün daha cəzbedici görünmək üçün necə geyinməlidirlər? Eləcə də bayram günü xanımlarını məmnun etmək istəyən bəylər hansı geyimlərə üstünlük verməlidirlər?

BakuCity.az-ın bu və ya digər suallarını tanınmış modelyer-dizayner Gülnarə Xəlilova cavablandırıb.

8 martda özəl geyim seçimində həm xanımlara, həm də həmin gün xanımları üçün özəl görünmək istəyən bəylərə dəyərli məsləhətlərini verən modelyer qeyd edib ki, geyimləri seçərkən diqqətli olmaq lazımdır:

Tanınmış modelyer Gülnarə Xəlilovadan 8 Mart məsləhəti: “Ən böyük trend zövqlü olmaqdır”, fotoşəkil-1

"Ümumiyyətlə, xanımlar hər zaman gözəl olmalı, gözəl görünməlidirlər. Ancaq hər bir insan daha çox öz zövqünə uyğun, özünə rahat olanı və yaraşanı seçib geyinməlidir. Sadəcə, bu ərəfədə keçirilən tədbirlərin mahiyyətinə baxmaq lazımdır: ziyafətdirsə, əlbəttə ki, ziyafət geyimləri daha uyğundur, kokteyl formatındadırsa, kokteyl geyimləri seçiləcək və s. Bəzi xanımlar hər zaman bəlli kostyum dəstlərindən istifadə edirlər. Bu geyimlərdən də ziyafətə uyğun olanını seçib geyinmək olar. Kostyumların günlük formatları da var və dediyim kimi, onların da uyğun olanından rahatlıqla istifadə edə bilərlər”. 

Təbii ki, bəylərimiz də hər zaman yaxşı görünmək istəyirlər, xüsusilə də xanımlar üçün çox önəmli olan günlərdə. G.Xəlilova Beynəlxalq Qadınlar Günü xanımlarına daha şux görünmək istəyən bəylərə də məsləhət verib:

“Bəylər arasında rəngarəngliyi sevənlər də var. Amma klassik görünüşə, tünd rənglərə üstünlük verən və dəblə ayaqlaşmağa lüzum görməyən bəylərimiz çoxdur. Bu bəylər qarderoblarında olan qara, qəhvəyi, göy, bej tonlardan və ya bir çox rənglərin tündlərindən ibarət geyim dəstlərini istifadə edə bilərlər. Dizaynerlər də demək olar ki, hər mövsümdə bəylər üçün həm çox rəngarəng, həm də ciddi üslubları təqdim edirlər.

Tanınmış modelyer Gülnarə Xəlilovadan 8 Mart məsləhəti: “Ən böyük trend zövqlü olmaqdır”, fotoşəkil-2

Mən hər zaman deyirəm: ən böyük trend zövqlü olmaqdır. Zövqlə seçilən geyimlər həm xanımlara, həm də bəylərə xüsusi görünüş verir. Təbii ki, dəblə ayaqlaşmağı sevən insanlar da var. Hazırda isə dəb gündəmində zövqlü geyimlərlə yanaşı, zövqsüz geyimlərlə də rastlaşırıq. Baxmayaraq ki, dizaynerlər bunu yeni dəb kimi təqdim edirlər. Geyim hər bir insanın özünə - boyuna, bədən ölçülərinə, saç, göz rənginə uyğun və düzgün seçilməlidir”.

Tanınmış modelyer bu yaz-yay mövsümünün trendləri barədə də məlumat verib:

“Bu yaz-yay mövsümündə çox qısa üst geyimlərindən (topik) istifadə olunacaq. Cins geyimlər, əsasən, dəst halda gündəmdə olacaq. Tropik üslublar – yaşıl təbiət, meşə, cəngəllik, ağacların rəngləri və s. üslublar gündəmdə olacaq. Heyvan rəsmləri (animal üslub) – bəbir, zebra, ilan dərilərinin naxışları da geyimlərdə istifadə oluna bilər. Həcimli qollar artıq uzun illərdir ki dəbdədir və bu mövsümlərdə də gündəmdə olacaq. Kombinezonlar gündəmini hələ də saxlayır. Keçən mövsüm parçalarda çox xırda güllər dəbdə idisə, bu mövsüm daha çox həcmli çiçəkli naxışlar gündəmdə olacaq. Şəffaf parçalardan hazırlanmış geyimlər və saçaqlar yenə də aktualdır. Rənglərdən isə daha çox qızılı ton rənlərdən istifadə olunacaq. Narıncı rəngin bütün tonları dəbdə olacaq”.

Hər bir qadın kimi, 8 Mart günü özünü fərqli hiss etdiyini, sevincli olduğunu və həddən çox təbrik aldığını deyən G.Xəlilova xanımlara öz arzularını da çatdırıb:

“Düzdür, bayramlarını qeyd edən xanımlar bir-birini də təbrik edir, amma məncə xanımlar yalnız bəylər tərəfindən təbrik olunmalıdır. Buna görə də mən bütün xanımlarımıza sadəcə arzularımı çatdırıram. Xanımlarımıza qadın xoşbəxtliyi, hər zaman gözəl görünməyi, yüksək geyim mədəniyyətinə yiyələnməyi arzulayıram. Sağlam olsunlar! Qadın sağlamdırsa, demək, Allah tərəfindən ona ən böyük gözəllik, hədiyyə verilib”.

Ramilə Qardaşxanqızı

BakuCity.az

Gülnarə Xəlilova 8 Mart dəb
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər