İranla sərhədin bağlanması Azərbaycanda böyük bahalaşmaya səbəb olacaq

İranla sərhədin bağlanması Azərbaycanda böyük bahalaşmaya səbəb olacaq

İrandan daha çox kənd təsərrüfatı məhsulları gətirilir

Azərbaycanın İranla həmsərhəd olan gömrük-keçid məntəqələrində sərnişinlərin gediş-gəlişi tam məhdudlaşdırılıb.

BakuCity.az-ın məlumatına görə, bu barədə Dövlət Gömrük Xidmətinin mətbuat xidmətinin rəhbəri Natiq Axundov Baku.ws-ə bildirib.

Qurum rəsmisi deyib ki, Çin Xalq Respublikasında aşkar edilən və qonşu İran İslam Respublikasında da yayılan koronavirus epidemiyasına görə Astara və Biləsuvar gömrük-sərhəd keçid məntəqələrində profilaktik tədbirlər görülür:

Həmçinin oxu: "Azərbaycanda koronavirus yayılıb" deyən həkim saxlanıldı

“Buna görə də həmin məntəqələrdə sərnişinlərin keçidinə müvəqqəti olaraq tam məhdudiyyət qoyulub. Yalnız Azərbaycan Respublikası vətəndaşlarının İrandan Azərbaycan ərazisinə, İran İslam Respublikası vətəndaşlarının isə Azərbaycandan İrana keçidinə icazə verilir”.

Nəzərə alsaq ki, Azərbaycan bazarlarında İrandan gətirilən məhsullar çoxluq təşkil edir, bu zaman bahalaşma qaçılmazdır.

Tanınmış iqtisadçı ekspert Vüqar Bayramov bildirib ki, İran məhsullarının ölkəmizə idxalı böyük bahalaşmanı qaçılmaz edir:

“İran Azərbaycan üçün vacib ticarət tərəfdaşlarından biridir. İranla Azərbaycan arasında ticarət dövriyyəsi 446 milyon dollardır. Bunun 404,8 milyon dolları İrandan Azərbaycana idxaldır, 31,2 milyon dolları Azərbaycanın İrana ixracıdır. Göründüyü kimi, biz İrandan daha çox məhsul idxal edirik. Bu baxımdan Azərbaycanın İrandan idxalı 13 dəfə çoxdur.

İranda koronavirusun yayılması İrandan Azərbaycana gətirilən məhsulların həcminə və strukturuna təsir göstərəcək”.

Ekspert deyib ki, faiz etibarilə İrandan Azərbaycana daha çox kənd təsərrüfatı və qida məhsulları idxal edilir. Buna görə də bu məhsullar bahalaşacaq:

“Azərbaycana İrandan daha çox kənd təsərrüfatı məhsulları gətirilir. Eyni zamanda, quru meyvələr, yüngül sənaye məhsulları, xüsusən də məişətdə istifadə edilən sənaye məhsulları idxal edilir.

Əgər koronavirusun miqyası genişlənərsə, İrandan Azərbaycana məhsul gətirilməsi dayanarsa, bu, böyük bahalaşmaya səbəb olacaq. Xüsusən kənd təsərrüfatı məhsullarının qiymətinə ciddi təsir göstərəcək.

Qiyməti daha ucuz olan kənd təsərrüfatı məhsulları Azərbaycana İrandan gətirilir. Əgər bu məhsulların idxalında çətinliklər yaranarsa, təbii olaraq onların qiyməti kəskin artacaq”.

V.Bayramov qeyd edib ki, hələlik İrandan idxal edilən yüngül sənaye məhsullarının qiymətində qida məhsullarında olduğu kimi ciddi artımlar proqnozlaşdırılmır:

“Koronavirusun yayılma səviyyəsi nəzərə alınsa, həmin məhsullarının idxalının davam etməsi, həm də bu məhsulların alternativ olaraq Rusiya və Türkiyədən idxal olunması kompensasiya edilə bilər”.

BakuCity.az

İran gömürk bahalaşma koronavirus
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər