Bakı limanı da dezinfeksiya olunur - VİDEO

Bakı limanı da dezinfeksiya olunur - VİDEO

"Qaynar xətt" də fəaliyyət göstərir

Koronavirus infeksiyasının Azərbaycan ərazisində yarada biləcəyi təhlükənin qarşısının alınması məqsədilə təxirəsalınmaz tədbirlər davam etdirilir.

BakuCity.az AzTV.az-a istinadən məlumat verir ki, Bakı Beynəlxalq Dəniz Ticarət Limanı koronavirus infeksiyasının Azərbaycan ərazisində yarada biləcəyi təhlükənin qarşısının alınması məqsədilə dezinfeksiya işlərinə cəlb olunub.

Dezinfeksiya işləri sərnişinlərin və yüklərin daxilolma məntəqəsində, Bakı Limanının inzibatı binalarında, həm Bakı, həm də Ələt qəsəbəsində yerləşən bütün terminallar və anbarlarda həyata keçirilir.

Yeni Bakl Limanının aparıcı mütəxəssisi Nərminə Kazımlının sözlərinə görə, liman ərazisində koronavirus təhlükəsi yoxdur:

“Biz profilaktik olaraq Bakı Limanı yaranan gündən bu prosesi həyata keçiririk. Sadəcə olaraq indi bu iş gücləndirilmiş rejimdə aparılır. Həmçinin qeyd edim ki, liman ərazisində təcili tibbi yardım maşınları da 24 saat fəaliyyət göstərir”.

Liman ərazisinə daxil olan sərnişinlər və yüklər xüsusi stasionar və mobil avadanlıq vasitəsi ilə yoxlanılır, yalnız bundan sonra liman ərazisinə buraxılışına icazə verilir.

Limana daxil olan sərnişinlər Dövlət Gömrük Komitəsinin əməkdaşları ilə birgə xüsusi avadanlıq vasitəsilə yoxlanılır. Liman və komitə əməkdaşları müvafiq mühafizə preparatları ilə təmin edilib, sərnişinlərin keçid məntəqələri mütəmadi dezinfeksiya olunur.

Mütəxəssislər deyir ki, dezinfeksiya zamanı yüksək təsirə malik və sertifikatlaşdırılmış proqrin dezinfektantdan istifadə olunmalıdır. Limana gələn gəmilər, insanların daha çox təmasda olduğu ərazilər dərman vasitəsi ilə dezinfeksiya edilməlidir. Dərman vurulandan yalnız 15 dəqiqə sonra məkana daxil olmaq olar. Allergiya halının baş verməməsi üçün dezinfeksiya olunan ərazi, qapılar və insanların əl vurduğu nöqtələr mütləq sabunlu su ilə yuyulmalıdır. Qida və qida üçün istifadə olunan qablar dezinfeksiyadan əvvəl yığışdırılmalıdır.

Qabaqlayıcı tədbirlərin görülməsi və məlumatlandırma məqsədilə +99455 450 78 84 nömrəli "qaynar xətt" də fəaliyyət göstərir.

BakuCity.az

Bakı limanı dezinfeksiya
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər