Bakıda Günəş enerjisi ilə işıqlandırılan səməni - VİDEO

Bakıda Günəş enerjisi ilə işıqlandırılan səməni - VİDEO

550 plastik butulkadan istifadə olunub

Paytaxtın mərkəzində Novruz bayramının əsas atributu hesab olunan səməni Günəş enerjisi vasitəsilə işıqlandırılıb.

BakuCity.az APA TV-yə istinadən məlumat verir ki, Böyük Britaniyanın ölkəmizdəki səfirliyi və AZGREEN Mühəndislik və Ətraf Mühit Xidmətləri şirkətinin birgə layihəsi əsasında hazırlanan səməni maketinin ərsəyə gəlməsində 500-dən çox birdəfəlik plastik butulkadan istifadə olunub. Layihənin məqsədi ictimaiyyətin diqqətini ətraf mühitin qorunmasına yönəltmək, cəmiyyəti tullantıların düzgün idarə olunmasını düzgün idarə edilməsi istiqamətində maarifləndirmək, həmçinin birdəfəlik plastik qablardan istifadənin azaldılmasını, alternativ və bərpaolunan enerji mənbələrindən istifadəni təbliğ etməkdir.

AZGREEN şirkətinin davamlı inkişaf üzrə mütəxəssisi Əlibala Xəlilovun sözlərinə görə, sözügedən səməni 24 saat fasiləsiz olaraq alternativ enerji, daha dəqiq desək, Günəş enerjisi vasitəsilə işıqlandırılır:

“Hazırda bu plastik səməni maketində 550 butulkadan istifadə etmişik. Bununla plastik qablardan ibarət tullantılara qarşı mübarizə aparmaqla bərabər, alternativ enerji mənbələrindən istifadəni təbliğ etməyə çalışırıq. Hazırda bu plastik səməninin işıqlandırılması Günəş paneli vasitəsilə həyata keçirilir. Biz bu layihədə 1 Günəş paneli, 1 invertor və 1 akkumulyatordan istifadə etmişik”.

Ə.Xəlilov deyir ki, ölkəmizdə bu sahəni inkişaf etdirmək üçün kifayət qədər potensial var:

“Hazırda gördüyümüz panelin üzərinə təxminən 8-9 saat Günəş işığı düşür və bu, kifayət edir ki, akkumulyator tam dolsun və invertorun köməyi ilə səməni 24 saat işıqlandırıla bilsin. Biz Günəş panelini xüsusi dirəklər vasitəsilə bərkitmişik ki, qurğuya böyük zərər dəyməsin və səməninin işıqlanması daimi olsun”.

Qeyd edək ki, qurum sözügedən layihəni başqa məkanlarda da reallaşdırmağı planlaşdırıb.

BakuCity.az

Bakı Günəş enerjisi səməni
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər