Yol polisi: Rayon sakinləri yük maşınlarının içində paytaxta girməyə cəhd edir

Yol polisi: Rayon sakinləri yük maşınlarının içində paytaxta girməyə cəhd edir

Sürücülərin yanında ikinci sürücü qismində bir şəxsə icazə verilir

Martın 19-dan bu günə qədər 4 mindən çox nəqliyyat vasitəsi, çox sayda insan geri qaytarılıb.

BakuCity.az xəbər verir ki, bunu Daxili İşlər Nazirliyinin Baş Dövlət Yol Polisi İdarəsinin İctimaiyyətlə əlaqələr şöbəsinin rəisi Kamran Əliyev Oxu.az-a deyib.

Onun sözlərinə görə, Nazirlər Kabinetinin mövcud qərarına baxmayaraq, insanlar qaydalara riayət etmək istəmir:

"Qaydalar qüvvəyə mindiyi gündən indiyədək 4 mindən çox nəqliyyat vasitəsi geri qaytarılıb. Təkcə ötən sutka ərzində Bakı-Ələt yolunda 814, Bakı-Şamaxı yolunda 182, Bakı-Quba yolunda isə 114 avtomobil geri qaytarılıb.

Nazirlər Kabinetinin müvafiq qərarına əsasən, martın 19-u saat 00:00-dan etibarən Bakı, Sumqayıt şəhərləri və Abşeron rayonunda qeydiyyatda olan sərnişindaşıma nəqliyyat vasitələrinin (avtobus, mikroavtobus, taksi və s.) ölkənin başqa şəhər və rayonlarından Bakı, Sumqayıt şəhərlərinə və Abşeron rayonuna sərnişin daşımaları qadağan olunub.

Bununla bağlı dəfələrlə media vasitəsilə məlumat verilib. Lakin insanlar həm özlərinin, həm də ətrafdakıların sağlamlıqlarını təhlükə qarşısında qoyacaq addımlar atırlar”.

K.Əliyev onu da bildirib ki, rayon qeydiyyatında olan şəxslərin çoxu yük maşınlarının içərisində paytaxta keçməyə cəhd ediblər:

"Yük maşınlarının (ərzaq məhsulları, kənd təsərrüfatı malları və digər yükləri daşıyan yük maşınları) sürücülərinin harada qeydiyyatda olmasından asılı olmayaraq, onların şəhərə giriş-çıxışına icazə verilir. Lakin onların Bakı, Sumqayıt, Abşeron qeydiyyatında olmayan hər hansı bir şəxsi maşında gətirməsinə icazə yoxdur.

Həmin sürücülərin yanında ikinci sürücü qismində bir şəxsə icazə verilir. O halda ki, onların hər ikisinin həmin yük maşınını idarə etmək üçün müvafiq sənədləri olsun”.

BakuCity.az

Yol polisi rayon sakinləri yük maşınları
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər