Bakıda kafe və restoranlar bir şərtlə açıla bilər - AÇIQLAMA

Bakıda kafe və restoranlar bir şərtlə açıla bilər - AÇIQLAMA

Bakıda kafe və restoranların açılmasında say məhdudiyyəti tətbiq edilə bilər.

Nazirlər Kabineti yanında Operativ Qərargahda kafe və restoranların nə zaman açılacağı və hansı iş saatlarının tətbiq olunacağı ilə bağlı müzakirələr davam edir.

BakuCity.azxəbər verir ki, qarşıdakı günlər ərzində Bakıda və rayonlarda restoranların fəaliyyətə başlaması barədə qərarlar açıqlanacaq.

Restoran və kafelərin açılması ilə bağlı dəqiq tarix məlum olmadığı kimi onların fəaliyyət prinsipləri də məlum deyil. Fəaliyyəti bərpa olunacaq bu məkanların eyni vaxtda nə qədər insanı qəbul edəcəyi, ara məsafəsinin hansı şərtlərlə qorunacağı və nəhayət, mümkün qiymət artımlarının olub-olmayacağı məlum deyil.

Millət vəkili Aydın Mirzəzadə BAKU.WS-ə açıqlamasında bildirdi ki, bəzi rayonlarda eksperiment olaraq bir neçə kafe və restoranı müəyyən şərtlərlə açmaq olar: 

"Təəssüf ki, koronavirusa yoluxanların sayı hələ də yüksəkdir. Buna görə biz ilk növbədə yoluxanların dinamikasında azalmaya nail olmalıyıq. Virusun yayılmasının qarşısı alındıqdan sonra kafe və restoranları açmaq mümkündür. Burada mütləq sosial məsafə gözlənilməlidir.

Biz Avstraliya təcrübəsindən istifadə edə bilərik. Bu ölkədə kafe və restoranlar 10 nəfərdən artıq müştəri qəbul edə bilmir. İnsanlar arasında məsafə isə azı 2 metr olur. Bundan əlavə insanlara qulluq edən personal əlcək və tibbi maskalardan istifadə edir.

Prinsipcə Bakı, Sumqayıt və digər rayonlarda COVID-19-a yoluxanların sayı azaldıqdan sonra bu praktikadan istifadə etmək olar. Eksperiment kimi bəzi rayonlarda bir neçə kafe və restoranın bu şərtlərlə işləməsinə icazə vermək olar. Bu şərtlər təbliğ edildikdən, sahibkarlarla iş aparıldıqdan sonra digər bölgələrdə də kafe və restoranların açılmasını təmin etmək olar".

BakuCity.az

Kafe Restoran
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər