Bakı polisi paytaxtda fəaliyyət göstərən kafe-restoranlarda reyd keçirib.
Sərtləşdirilmiş karantin rejimi tətbiq edilən şəhər və rayonlarda bu gündən kafe-restoranların, ictimai iaşə obyektlərinin fəaliyyətinə icazə verilib. Saat 9.00-dan 22.00-dək icazə verilən fəaliyyət dövrü ərzində həm obyektlər, həm də müştərilər üçün qaydalar müəyyən edilib.
Bakı Şəhər Baş Polis İdarəsi paytaxtın müxtəlif rayonlarında bu qaydalara əməl edilməsinə nəzarət məqsədilə tədbirlər keçirib.
BakuCity.az xəbər verir ki, tədbirlər zamanı istehsal, xidmət və ictimai iaşə sektorlarında müştərilərin qəbulu, xidmətin sanitar-epidemioloji normalara uyğun aparılması və insanlar arasında sosial məsafənin qorunması ilə bağlı sahibkarlar təlimatlandırılıb.
Bakı Şəhər Baş Polis İdarəsinin Mətbuat Xidmətinin rəisi Elşad Hacıyev bildirib ki, qaydaların gözlənilməsi zamanı sahibkarlarla təlimatlandırma işləri aparılıb:
“Bütövlükdə aparılan müşahidələr göstərir ki, əksər kafe-restoranlarda sahibkarlar və müştərilər tərəfindən bu qaydalara əməl olunur. Qaydalara əməl etməyənlər barədə qanunvericiliyə uyğun olaraq müvafiq tədbirlər görülür”, - deyə E. Hacıyev bildirib.
Qeyd edək ki, tədbirlərdə İqtisadiyyat Nazirliyi yanında Dövlət Vergi Xidməti, Qida Təhlükəsizliyi Agentliyi və Xətai Rayon İcra Hakimiyyətlərinin əməkdaşları da iştirak ediblər. (report)
